أسئلة ضرورية جدا إلي..أرجو الإجابة

[طالب مخلص بكالوريا]

السلام عليكم أول شي:

أنا من كم يوم خلصت فحص بكالوريا والحمد لله...وبدأت أفكر في فرع مناسب

أنا من أول السنة حابب فرعكم(المعهد التقاني للحاسوب)وإن شاء الله متوقع أجيب علاماته المطلوبة...لكن لهلأ ما اعتمدت وبدي أسأل كم سؤال حول المعهد...


يعني إن شاء الله تجاوبوني عليهم لأنو ما حدا رح يجاوب عليهم مظبوط غيركم كونكم طلاب في هالمعهد

يعني أنا ما عم أتسلى ويمكن على ضوء إجاباتكم أحدد قراري بدخول هالمعهد او عدمه...

1_هل صحيح إنو السنة القادمة رح تصير سنوا ت الدراسة 3سنوات؟؟


2-أنا سمعت إنو ما عندكن كتب!!!طيب يعني شلون الواحد بدو يدرس..يعني ما فاتت في عقلي!!


3_هلأ يللي بيطلع من الأوائل بيكمل هندسة صح؟؟(هل بيتغير هالشي إذا صار 3سنوات)

والسؤال الأهم إنو هالموضوع بيدخل فيه واسطات ومحسوبيات .؟..وإذا لأ ..ما هو مقدار الصعوبة في الوصول لدرجة الأوائل؟؟


وأخيرا كلمة عامة بتنصحني فيها بالتسجيل أو عدمه؟؟


أتمنى من كل قلبي أن أجد الردود الشافية وحتى لو رد أكتر من عضو أتمنى استمرار الردود حتى لو كانت غير متفقة بالراي لآخذ أكب رقدر ممكن من الآراء..

ولا تآخذونا وشكرا لكم..

[مــحــمــد]

وعليكم السلام ورحمة الله وبركاته ...

يا 100 هلا فيك ...شايف هالمنتدى شو سريع بالإجابة :)
عقبال خلاصك من الجامعة أخي "طالب مخلص الباكلوريا" ..

هلأ السؤال مني :"هل عندك رغبة قوية بالكومبيوتر ؟؟"...
لأنو بالنسبة لي هاد السبب اللي خلاني حط المعهد أول رغبة رغم أني جايب 203 ...

1- حكي ما طلع أي قرار ...وحتى لو ..بكون من صالحنا لأنو بيرتفع مستوى الشهادة ..

2-أخي أول ما تفوت على المعهد بدي أعطيك شي 5 غيغا كتب إقرأ لتشبع :) ..
طيب شلون الواحد بيدرس ؟؟
أول الشي المعهد غير الجامعة ...دوام نظامي ومذاكرات ومتابعة للأساتذة من أول السنة..
طبعاً بتعمل جهدك تكون دائماً أول مقعد ...وما تغيب على ولا درس ...وما سك هالورقة والقلم
ونازل كتابة (هي عم حاكيك مشان الجامعة ) ....

((طبعاً أنت هلأ محظوظ ملاقي مين يحكي لك..لأنو أنا قضيت الفصل الأول مالي علاقة :) ))

3-صح ...بس ليش ليتغير ؟!

4-لا ما في واسطات ....
ولا شي ...راس مالها الأشياء اللي حكيتهم ب 2 ...

بتنصحني فيها بالتسجيل أو عدمه؟؟
بالنسبة لي أنا سعيد جداً فيه لأنو داخله عن رغبة ....
فإذا أنت بتحب الكمبيوتر وعندك رغبة بإتقان علومه فأكيد بنصحك ...
أما إذا بدك تدخله من باب أنو والله عصرنا عصر كمبيوتر والأمي بالكمبيوتر وو من حكي العوام...
فهون بقلك روح على رغبتك (إذا كانت غير الكمبيوتر) ...

وإن شاء الله قدرت فيدك ...

وبإنتظار آراء باقي الإخوان ...

والسلام عليكم .

[Golden man]

أهلا و سهلا فيك و مبروك انتهائك من البكلوريا (الهم الأعظم)

بالنسبة للأسئلة:


1_هل صحيح إنو السنة القادمة رح تصير سنوا ت الدراسة 3سنوات؟؟


ما في شي مؤكد لهلأ و الحكي يلي صار أنو إذا صار 3 سنين بتكون السنة التالتة اختيارية . و إذا بدك الجواب الشافي روح على وزارة التعليم و اسأل مدير المعاهد المتوسطة.



2-أنا سمعت إنو ما عندكن كتب!!!طيب يعني شلون الواحد بدو يدرس..يعني ما فاتت في عقلي!!



بالنسبة لهي شغلة الكتب مو صحيحة و ما في عندنا لا كتب و لا شي . يعني ما في غير كتاب رياضيات و كتاب عربي و كتاب ثقافة و كتاب انكليزي و هدول المواد ما الهم علاقة بالاختصاص (الكمبيوتر) و إنما كل شي بيعطوه الأساتذة هوة المطلوب و بدك تكتب معهم كل شي بدون استثناء لأنو ما بتعرف شو بيجيك بالامتحان .

و بالنسبة لشلون الواحد بدو يدرس : لازم تحضر كل المحاضرات دائما و تكتب كل شي و تطبق كل شي بالمحاضرات العملية و بس ترجع للبيت . بس لا تخاف الشغلة ممتعة و ما فيها أي صعوبة.



3_هلأ يللي بيطلع من الأوائل بيكمل هندسة صح؟؟(هل بيتغير هالشي إذا صار 3سنوات)



لحد الآن القرار ماشي لأنو ما نزل شي بيلغيه و بالنسبة لشغلة ال3 سنوات كمان ما في شي أكيد لأنو ما نزل أي قرار نظامي من الوزارة بهالشي.



والسؤال الأهم إنو هالموضوع بيدخل فيه واسطات ومحسوبيات .؟..وإذا لأ ..ما هو مقدار الصعوبة في الوصول لدرجة الأوائل؟؟


بحب طمنك أنو عندنا ما في لا واسطات و لا شي و المعهد ماشي تمام و الحمد لله و ما في مشاكل أبدا من هي الناحية .
و بالنسبة لدرجة الصعوبة مو كبيرة , بس لازم يكون عندك إصرار أكتر من 200 طالب حتى تقدر تسبقهم و الشغلة بدها متابعة دائمة و استيعاب كل المعلومات المعطاة و المشاركة بالمحاضرات و احترام الأساتذة ....
و إذا بدك تتأكد اسأل أستاذنا Executioner لأنو هوة طالب متفوق و فهمان كل شي (الله يتمّ عليه).



وأخيرا كلمة عامة بتنصحني فيها بالتسجيل أو عدمه؟؟



إذا كان هدفك الكلية فسجل و اتبع يلي قلته فوق أما إذا كان هدفك التخرج بشهادة المعهد فقط فلازم تدخل معاهد و تاخد شهادات خارجية متل MCSD , MCSE , .......... حسب الاختصاص.

بس اختصاصنا برأيي أروع اختصاص لأنو كل شي بتقدر تطبقه عملي و تشوفه مباشرة .

[Dark man]

و نعم الجواب اخي غولدن مان

ما شاء الله يعني ما خليتلنا كلام نحكيي بعدك

بس انا بخالف باحدى النقط

والسؤال الأهم إنو هالموضوع بيدخل فيه واسطات ومحسوبيات .؟..وإذا لأ ..ما هو مقدار الصعوبة في الوصول لدرجة الأوائل؟؟

اخي مشان النقطة بدو يكون عندك سياسة بالتعامل مع الاساتذة

لانوا اذا كنت من النوع يلي ما بيسكت على وحدة و على طول بيكبر راس

ما لح يمشي حالك بنوب

يعني بدك تساير الاستاذ حتى ولو كان كلاموا غلط

و ممكن تقابل كتير اشختص من ذوات النفسيات المريضة

بدك تحاول تستوعبهم

و مشان الوصول للاوائل اذا كان عندك معلومات مسبقة عن الكومبيوتر و انتا رغبان بهالمجال
فما بيلزمك الا شوية متابعة مع الاستاذ و انا بضمنلك النجاح و التفوق
لانوا بصراحة منهاج ولا اسهل من هيك بس بدك شوية متابعة

[VCO-LO]

اي الف مبروك عبال التخرج النهائي
قال يعني فرحان بحالوا لسه ما شفت شي
جوابك موجود على هالروابط
بنصحك تتمعن كتير منيح بالقراءة مشان ما تنصدم بكرا
نصيحة من اخ لاخوا

http://www.100hla.com/vb1/showthread-t_2612.html

http://www.100hla.com/vb1/showthread-t_1929.html

http://www.100hla.com/vb1/showthread-t_2419.html

اطلع على هالموضيع و بعدها قرر

.................................

[allmaida]

الحمد لله على سلامتك اخي هي اول شي

وماشاء الله اخوتي وبالذات golden man ما خلا شي ما قالو

بس تعليقا على فكرة انو يكون عندك خلفية او لاء صدقني بجوز تساعدك شوي

بس مو هية الشي الاساسي لانو انا فتت على المعهد ما بعرف بالكمبيوتر الا

الالعاب وبس وهلأ الحمد لله معدلي ماشي حالو وانشالله بكون الي ترتيب بين

الاوائل بس متل ما حكو اخوتي لازم تكون اول شي روح التحدي عندك بأوجها

ودائما تكون متابع وكمان اذا بتحاول تساير الاساتذة شوي مو غلط

على كل القرار بيرجع الك ولا تخلي حدا يأثر على قرارك لانو هي حياتك واللي

بتختارو هلأ حيقرر مستقبلك ففكر على مهلك والله يخترلك الخير

بتمنا كون حسنت فيدك ولو شوي .....

واخير السلام عليكم ورحمة الله وبركاته

[dr.Hiba]

اولا اهلا ومرحبا فيك بين اعضاء اسرة يا هلا
بالنسبة لموضوعك هادا رأيي والرأي لالك اولا واخيرا ....

1- انا بالنسبة لمعلوماتي عن عدد سنوات المعهد وحسب كل شي وصلنا عن هالموضوع بقدر قلك انو احتمال وجود سنة ثالثة في المعهد هو احتمال غير موجود وان المعهد سيبقى سنتان وان ذلك الاحتمال كان موجود قبل وجود اقسام المعهد الثلاثة الا وهي (برمجيات – حواسيب – شبكات ) .

2- الحقيقة الكتب مو موجودة الا يلي ذكرها الاخ golden man وحكيو صح 100% بخصوص هالموضوع ..
ومشان المحاضرات كل شي بيكون من خلال المحاضرة يعني انك ما تحضر المحاضرة النظري وتصورها وبعدين تحفظها .... هادا مو حل بنوب لانو وقت العملي بيكون كتير صعب تستوعب المادة وتفهمها منيح واول شي تحبها لانو لو ما حبيت المواد صعب تنجح فيهم وخاصة انو المواد مو كلها سهلة لانو في ناس بتقول انو المعهد سنتين فمواده سهلة وهادا الحكي غلط تماما المعهد بدو دراسة متلو متل أي معهد وفي مواد بدها دراسة زيادة لحتى تقدر تحصل فيها على علامات منيحة ...

3- نسبة الاوائل من كل سنة هي 3% من الناجحين ومن سيكون

من
الاوائل سيدخل كلية الهندسة المعلوماتية ليكمل باقي سنوات الدراسة .. اما بخصوص 3 سنوات فلا ادري أي شيء

4- ان تكون من الاوائل ليس صعب جدا ولكن الاصعب هو ان تدخل المعهد وتخرج منه من دون ان تتأقلم مع تلك المواد ... وخاصة مادة البرمجة يلي هي اساس البرمجيات .... او من دون ان يكون لك هدف في المستقبل بعد هذا المعهد ... لان المعهد سنتان وبعده ستتخرج منه ولا يكفي ابدا ما تعلمته فيه بل تحتاج الى خبرات ودورات ووو .... وكل ذلك لكي تقوي علاقتك مع الكومبيوتر ولكي يسهل عليك التعامل مع كل ما هو موجود فيه ....

بالنسبة للنقطة الاخيرة الا وهي
"""" هل تنصحني بالتسجيل فيه او عدمه ؟""""

اخي الكريم ::
اعتقد ان كلامي السابق كافي .... وحتى كلام من سبقني بالرد على موضوعك ...

ولكن نصيحتي لك ::

ان كنت على علاقة بالكومبيوتر حتى وان كانت ضعيفة فلا تترد ثانية في ان تدخل في هذا المجال ولا حتى ان تفكر لانك ومن دون ان تدري ومع الوقت وخاصة اذا زادت علاقتك به ستفرح بالاشياء التي ستنجزها في هذا المستوى .. قد يدخل البعض هذا المجال ليتخرج بأي شهادة والبعض الاخر لكي يصل الى الكلية وما بين هذين النوعين تندرج الكثير من الانواع ولكل منهم رأيه ولكل منهم هدفه ومنهم لا هدف له ..

اتمنى ان يكون دورك فعال سواء في مجال الكومبيوتر او في غيره من المجالات ... وان تنجح في المجال الذي ستختاره وان تختاره عن قناعة كذلك ... وابذل فيه قصارى جهدك ....
ولا تنسى ابدا ان تحدد الهدف الذي تريد ان تسعى اليه سواء في هذا المجال او غيره ..

اتمنالك التوفيق وان تختار الاختيار الصحيح ...
فكر كتير .. واسأل اكتر .. ولكن ... وفي النهاية .... اقتنع بما فكرت فيه وبما قررته .... لأن من سيدخل المعهد هو انت ...

[Most Hacker]

نصيحة اخوية
معهدنا هوه أفشل معهد بالعالم و ما في منو فائدة غير ضياعة الوقت

و إذا بدك تستفاد بنصحك تدخل بشي معهد خاص محترم و تدرس كورسات الشهادات الدولية المعروفة متل ........mcse..........mcp....oracle......rhce
و تاخد هالشهادات من الشركات الأم لأنو هالشهادات بتسوى مليون من شهادة معهدنا

أساتذة محترفين بالمعهد عنا حكولي أنو شهادة المعهد مو كتير مهمة و أنو الشركات بتدور على مقدار خبرة الشخص أكتر من الشهادة

[JAXS]

والله يا طالب خالص بكالوريا بنصحك أنو اذا بدك تفوت عالمعهد فيا فوت وروح عالكلية ويا فوت اختصاص شبكات وكمل دراستك بعد المعهد وخود شهادات network+ وccnaو ccnb ووووو...... لأنو بيني وبينك اختصاص الشبكات اختصاص جديد بالبلد ومرغوب فيه بس بدو شغل أما اختصاص البرمجة مع احترامي للكل فهوي اختصاص قليل شوي بالبلد ومو الكل بلاقي شغل بس اذا بدك يا لبرات البلد فهوي افضل الكل بس هاد الاختصاص صعب كتير وبدو تعب أما بالنسبة لاختصاص الحواسيب فأنا ما بعرف شي عنو غير أنو بياخدو A+ ولينوكس

بقا خود بهالنصيحة احسنلك وبالنسبة للكتب فعم ناخد محاضرات مطبوعة ودفاتر مصورة ونمشي حالنا بس أوعا تحمل رياضيات نصيحة من أخ لأخو

سلااااااااااااااااااااااااااااااام

[نجمة المساء]

مية هلا فيك أخي ومبروك انهيت أحلى مرحلة بالحياة الدراسية
بتصور انو اخواني نقلوا لك صورة كاملة عن معهدنا بس طالما طلب رأينا فهو التالي
اذا انت عندك ارادة و حب لعالم التطور والتقنيات فتوكل على الرحمن وادخل المعهد
يمكن معهدنا مو هادف متل اسمه بس بيقدم لك كتير
قاعدة تنطلق منها وصورة عن تشعبات علوم حاسوب لحتى تختار مجال تختص فيه بعد تخرج
وبحالة كنت من طلاب المتابعة و المهتمة فرح يفتح لك باب لدخول الكلية
تأكد انو بكل كليات وفروع في جانب حلو وجانب مظلم وانت ماعليك غير تعرف تستثمر وقتك
وبالنهاية متل ماقالت أختي هبة
اقتنع بما فكرت فيه وبما قررته .... لأن من سيدخل المعهد هو انت ...

[طالب مخلص بكالوريا]

أخي النمر...ردك حلو وعجبني وكمان الإخوان golden man -dark man ...يعني ردودكم متقاربة من حيث الرأي


أما بالنسبة للروابط يا vco-lo فأنا زرتهم..ورأيي هلأ بتقرأه..

allmaida ...الصراحة كلامك مشجع ..يعني ما كنت بتعرف عالكمبيوتر ومتوقع تطلع من الأوائل..دليل إنك اشتغلت على حالك

dr.hiba ...شكرا أولا على هالرد الموسع...وتقريبا أظن رأيك قريب من رأي الأخوة يللي قبل..



Most Hacker...يعني انت من المعارضين للمعهد..طيب مشكور على كل حال ورأيي بعد شوي بتقرأه..


jaxs ...يعني إذا اعتمدت 100% أسجل..فرح آخذ وجهة نظرك بعين الاعتبار وأسأل عنها..

نجمة المساء..يعني الصراحة أنا أحد الأشياء يللي شجعتني أدخل على المعهد رغم إنو رح يعارض البعض لأنو معهد ومو جامعة ومن هالحكي..هالشغلة هيي الإرادة وحب العلم يللي حكيتي عنها



أما رأيي بعد قراءة الردود فهوي

أنا تشجعت أكتر لهالفرع رغم المشاكل الموجودة في الروابط..لأنو طالما في طلاب عاجبهم الوضع متل الأخوة يللي ردو هون...يعني الأمور قد تكون جيدة ليللي بدو يتعب على حالو ويشتغل ...
يعني لو كانت نسبة الطلاب الراضين عن المعهد وأمورهم تمام 5% ليش ما أكون أنا منهم؟؟؟


وفعلا ألف شكر إلكم مرة تانية كل يللي جاوبو وأي ردود أخرى أنا جاهز..:)

[نور الدين]

السلام عليكم
برأي اللي بحدد توجهك إذا رح تدخل على المعهد أم لأ هو علاماتك وبتوقع مابينخاف عليك من هي الناحية
تاني شي هو أهتماماتك: يعني إذا ماكان عندك رغبة بهاد المجال نصيحة لاتدخلوا وحتى لو علاماتك سمحتلك لأن الحياة العملية بدها مبدعين مابدها بصيمة
تالت شي بدها ولو أنو خلفية بسيطة عن الكمبيوتر لأن رح تضوع وقتك بتعلم المبادئ بالوقت الي بكونوا أصحابك عم يطوروا مهاراتن ومدة السنتين بالمعهد مارح تكون كافية بالنسبة إلك لتتطور كتير وهون بيجي دور الدورات والكتب
تالتا خلي عندك روح التحدي والتفوق ورح تشوف أنو البكالوريا كانت تسلاية أدام المعهد أنا ماكنت أدرس بالبكالوريا أد مادرست بالمعهد وليكني مو هاد الترتيب العالي
نصيحتي ألك شوف شو المجال اللي بتأبدع في واستخير الله وأدخلو
وهاد رأي إنشاء الله منشوفك بالمعهد السنة الجاي.

[نجمة المساء]

أنا أحد الأشياء يللي شجعتني أدخل على المعهد رغم إنو رح يعارض البعض لأنو معهد ومو جامعة ومن هالحكي..

والله يا اخي انو انا صار معي نفس الشي وصلت القصة لأنو ادخل المعهد على مسؤوليتي الشخصية وخصوصا لمن بتكون اول واحد بالعيلة بده يكسر قاعدة ويدخل معهد
وبرجع بقلك مية هلا فيك بمعهدنا واي خدمة بتطلبها طلاب البرمجة بيخدموك بعيونهم

[J*O*H*N]

اول شي ألف مبروك بعد انتهاءك من البكالوريا....ولو إني متأخر :p
بس بعد تجربتي الصغيرة بالمعهد:
بس بدي قلك بغض النظر عن الأساتذة و المواد الشي الحلو يلي رح تتعلمه من المعهد:
هو إنك رح تعتمد على نفسك بالبحث و الدراسة والفهم و رح تكون الانترنت مرجعك الأول والأخير....
أنا تشجعت أكتر لهالفرع رغم المشاكل الموجودة في الروابط..
صدق يلي بدو يدرس بيدرس وهي المشاكل للآسف بكون الطالب مو حابب يدرس بروح بيفتح كم موضوع عن المعهد....طبعا أنا ما عم دافع عن المعهد بس فعلا لو بدنا ندرس مندرس برغم كل شي عم يصير بالمعهد
وعندي أخيرا تعليق صغير:
هندسة البرمجيات== هندسة الشبكات== هندسة الحواسيب :eek: ;)
يعني على مين عم نضحك كلنا شفنا أنه مواد السنة الاولى لكل الاختصاصات نفسها و بيختلفوا بكم مادة .... الله اعلم من مواد السنة التانية إلكم...
و أخيرا أنا بنصحك المعهد...وأهلا وسهلا فيك بالمنتدى ;) ...وبالمعهد إن سجلت 6smil
مبـــــــــروك لأســـبانـــيا

[martin]

أخي بصراحة smil1
المعهد ما بتاخود منو غير الشهادة بدون علم يفيد 7smil
ولازم تعرف إذا فتت إنك إذا ما بحبشت ونبشتن عن مراجع تدرس المادة منها مارح تستفيد4smil
لأن بصراحة معظم الأساتذة بيعطوك فقط رئوس أقلام 6smil
وأنت طبعاً متعود بلبكلوريا علشرح التفصيلي9smil
أما بلنسبة للواسطات وهلحكي تئكد أنو عاري عن الصحة تماماً9smil
بس في شغلة كتير مهمة لازم تعرفها
أنا درت معظم الكليات وعندي رفئات بكل الأفرع مالئيت أحلى من جو معهدنا6smil
شو مابدك موجود
المزح موجود
الجد موجود
المساعدة والتضامن موجود

وأخر نصيحة إذا صرت عنا بلسنة لجديدة لاترد عحكي الطلاب يللي بأحبطوك
وستشير الطلاب تبع السنة التانية لأن أكيد بفيدوك
أنا عمبعطيك خلاصة أخطائي وتجربتي
وأخر شي بئلك خليك جدي من أول لحظة وخارج المحاضرة خلي رفيئك التئفيلthnx
وبلنسبة لأختصاص البرمجة
بدي ألك أنو حتى عنى بلبلد ماشي
لأن أقل شي فيك تعملو بختصاصنا هو تصميم المواقع وهي الشغلة منتشرة ومطلوبة
أما الشبكات والحواسيب فعميجي شخص متعلم المصلحة عمبكون بوازيهون
هاد رئيي
سلاممممthnx

[J*O*H*N]

شو مابدك موجود
المزح موجود
الجد موجود
المساعدة والتضامن موجود

:confused: :confused: :confused:
يحرق حريشك حااج تشجعه للزلمة...شو رايح على نادي أخونا 5smil
وأخر نصيحة إذا صرت عنا بلسنة لجديدة لاترد عحكي الطلاب يللي بأحبطوك

ليك مين عم يحكي :eek: .... ليش مين حط موضوع احبط طلاب التي سي سي 4smil

[غياث]

على مبدأ خير الكلام ما قل ودل:
استخر الله و قرر

[طالب مخلص بكالوريا]

نور الدين:
لأ بالنسبة للرغبة والاهتمام موجودة تمام...والخلفية أيضا متوفرة..يعني شروطك متوفرة فيي..:)

نجمة المساء:
هوي بصراحة أنا اقتنعت بكل شي وحتى هالفكرة مقتنع فيها تمام..بس يقتنعوا فيها أهلي..


john


صدق يلي بدو يدرس بيدرس وهي المشاكل للآسف بكون الطالب مو حابب يدرس بروح بيفتح كم موضوع عن المعهد.

فعلا أنا هادا رأيي..

وبالنسبة للدراسة أظن هالطريقة بيمشي حالها معي كوني عندي خلفية جيدة في التعامل مع الكمبيوتر والإنترنت


martin
كلام حلو وجديد عن جو المعهد ومشجع يعني..


غياث
هوي الشي الأكيد إنو قد ما أسمع آراء رح أستخير في الأخير قبل التسجيل..


وشكرا إلكم جميع على هالردود يعني إني عم أشوف هيك أعضاء فهمانة في هالمعهد كمان تشجعت أكتر إلو..